اااااااا الحرامي

الحرامى أبو عين جريئة سرقنى واحتل دارى

خلى أيامى طويلة وليلى ضلمه وكمان نهارى

من بجاحته قال دا بيته آه يا غيظى آه يانارى



قاللى حقه قلت اثبت قال لى بلفور عدهالى

زى عقرب زى حية سمه سارى فى العلالى

قلت اطلع قاللى لأه هنا حياتى وكل حالى



برطع فى بيتى فى كل حته لبد كده زى الغراب

ليل نهار صوته بينعق جه وجاب معاه الخراب

أصله خاين أصله غاشم عمره ما كان له اصحاب



قلت ياجيرانى الحقونى قاموا وقفوا واحدة واحدة

قالوا بس اهدى حبة ممكن نعمل بينكوا معاهدة

قلت لأه مش حينفع أنا عايز منكوا المساندة



قالوا نسأل شيخ حارتنا نعمل إيه ويا الحرامى

قالهم نقعد نفاوض يمكن البيه يسمع كلامى

قالوا جايز قالوا ممكن التعلب يبقى .. سيامى



الحرامى قال خلاص هى أوضة ليك لوحدك

واللى باقى ليه خالص مش هاقرب تانى عندك

شيخ حارتنا قاللى ماشى اقبل وانا حاساندك



هيه ليله بس ليله الحرامى جاب قرايبه

الجيران سابونى وحدى مستحيل اقدر احاربه

وشيخ حارتنا حرج عليه انى اقرب تانى جنبه



غلى دمى جوه منى قلت ياللا يا شيوخ حارتنا

الحقونى انقذونى من الحرامى حيهد بيتنا

قالوا حاضر قالوا طيب حبه لما نقعد قعدتنا



لموا حبه من الشيوخ وحبه تانى قالوا لأه

شويه تانى نايمين كسالى محتاجين والله زقه

لسه برضه نستنى تانى وحياة ابوكوا كفاية فرقه



الحرامى هد دارى وانا عيالى فى الضياع

والشيوخ حرام غلابة لسه قاعدين فى اجتماع

قلت قوموا قلت شوفوا ياللى كنتوا زمان سباع



الحرامى واحدة واحدة سرح قوام ع الجامع

والغريب إن الجيران كلهم شايف وسامع

بصوا قالوا ابعد بعيد والله .. لا انت طالع !!



ده الحرامى يا ناس جبان انتوا ليه كده خايفين

لو كنا سكتنا من زمان ما ينفعش نفضل كده ساكتين

هو معاه الشيطان واحنا معانا ايمان ودين



يا شيوخ حارتنا ياللا بينا نرفع بقه راية الجهاد

ربنا هو اللى أمر وأمره واجب على العباد

قبل الحرامى ما يهد تانى ويبقى الجامع ده رماد



التاريخ حيقول علينا عار عليهم مفيش زيهم

الحرامى هد بيتهم وأقصاهم واحتل ارضهم

واحنا اسرى حتى صوتنا مخنوق فى بقهم



ياشيوخنا ياللا بقه مش كفاية ذل ومهانة ؟؟؟؟

الجيران عايشين فى شقا واحنا نايمين فى إستكانه

والحرامى النورى لا دين ولا رحمة ولا امانة



يارب ما قدرش اشيل سلاح غير إيمانى وتقوتى

يارب سامحنى حاولت وحاولت على قد قدرتى

بالكلمة وبالدعا والتوسل وانت اللى عالم شكوتى



يارب فرج على المسلمين كلهم من هنا لفلسطين

والسودان والصومال والنيجر وكل الموحدين

وكمان الشيشان وافغانستان وبلاد الرافدين



يارب إحنا قصرنا فى حقك وتعبتنا الذنوب

يارب اقبل رجوعنا وساعدنا عشان نتوب

وثبت قلوبنا على الهدى ياكريم يا مثبت القلوب



يارب يارب يارب



ولا تنسوا أن تدعوا على الحرامى وتدعوا لشيوخ حارتنا بالهداية

ولا تنسوا اخوكم الفقير إلى الله من صالح دعواتكم

بارك الله فيكم جميعاً

يارب إحنا قصرنا فى حقك وتعبتنا الذنوب

يارب اقبل رجوعنا وساعدنا عشان نتوب

وثبت قلوبنا على الهدى ياكريم يا مثبت القلوب


اللهم امين