أنا و صاحبى علي القهوة..
ساعات بنقول كلام طايش..
أنا .. بصرخ من الحاصل
و هو يبوس إيديه و يقول :
بحمد الله انا عايش.
بقوله ف يوم :
بقالى زمان وانا قاعد و بستنظر,,
لا شغل لاقيه ولا هيبة و لا منظر
حاولت كتير اخطى الصعب لاجل اوصل
مابوصلشي,,
و ف الاخر بحط فى شايي معلقتين مرارة و يأس و اشربهم و اقوم و امشي
انا فى سكة مابرسمهاش
و عمرى فيها ضاع فى الصبر و صبرى فيها ضاع ببلاش
جاوبنى بنظرته الصافية و صوته الهادى و البسمة
بلاش تيأس عشان بلدك بتحتاجك سند ليها
تعليها تشيلك هى في عنيها
ده حتى الطير بيرمح في السما دايما و لا بيكل
و يأسك مش هينفع يوم و لا هيحل
جاوبته و قلتله بحرقة
انا مش وحدى ف الازمة
انا ف طابور ماليه الناس و في مليون طابور جنبي
بناكل بس بنفكر.. هناكل بكرة و لا نصوم؟
و لو غيرنا اكل خيرنا .. نسيب القعدة ليه و نقوم
بفكر كل يوم اهرب .. و دنية ربنا واسعة
و انا هسعى.,,
واحقق كل حلم حلمته ما تحققش
عشان حلمى البسيط جدا حاولت احكيه و ماتصدقش
جاوبنى و قال :
عشان حب الوطن نعمة ما هتسيبهاش
وطن غيره مافيش فيه الحنان و العطف
مفيش فيه الشوارع لما تتعاهد مع الزحمة
و شوش الناس..
و هى بتفطر الصبحية من العربية ع الناصية
وشوش صافية بتتحمل و رغم الجرح مش قاسية
وطن غيره مفيش فيه الولاد شايلين شنطتهم
و البنات لابسة المرايل.. و الجرس ويا الادان
محلات الخضار و الفاكهة ع الصفين
و نيل بلدك يشق القلب يروى بميته الشريان
بلدنا ساعات كما كل البلاد ف الكون تكون مرة
لكن مهما المرار يكترتعيش حرة .. تعيش حرة.
مشيت م القهوة بعد كلامه افكر ف الكلام كله
و من يومها لحد الان
مش عارف .. انا اللى صح و لا الصح كان هو؟
السبت أبريل 26, 2014 1:22 am من طرف نبع الورود
