يا حبيبتي يا مصر يا مصر يا حبيبتي يا مصر يا مصر ….يا حبيبتي يا مصر .
دلوقتي ولكل أهل مصر المهروسة ..تعالوا أشتركوا في مسابقتنا الجامدة جدا…مسابقة سهلة وبسيطة ومش محتاجة تبسيط…مش محتاجين منك غير اتصال واحد بس علشان تدخل السحب الكبير ..وعايزينك تكون فاكر ، كل تكون مفروس اكتر ومتغاظ اكتر ..فرصك في السحب حتكتر …وجوايزنا عشر جوايز لكل اهالي مصر المفعوصة…. وجايزتنا الاولي 70 سنة أعتقال في طرة ..أيوة طرة …وجايزتنا التانية فرصة للاستمتاع بمياة البحر الاحمر في عبارة حتغرق كمان اسبوع وتستمتع مع السمك وهو بياكلك …وجايزتنا التالتة فرصة للعيش تحت صخور الدويقة لمدة خمس أيام وبعدين حندفنك في مقابر أكتوبر …أيوة أكتوبر يعني نقلة تاني في حياتك وحياة اهلك… والمفاجاة في جايزتنا الرابعة انك حتختار قطر من قطارات الصعيد بنفسك علشان تتحرق فية ..ايوة حتختارة بنفسك متستغربش …والجايزة الخامسة فرصة للغرق في البحر المتوسط في رحلة هجرة غير شرعية مع أربع أفراد من أصحابك…والجايزة السادسة أنك تكون من المحظوظين اللي حيشوفوا مشنقة الاعدام في ليبيا ومعاها كفن هدية …وجايزتنا السابعة انك تدخل الامن المركزي وتضربك أسرائيل علي الحدود…. وجايزتنا الثامنة .40 لتر مية من اللي بتجيب فشل كلوى ليك ولحبايبك …وجايزتنا التاسعة ب7 جنية عيش بالمسامير والبلا الازرق اللي حنطلعة علي جتتكم….. وجايزتنا العاشرة حنديك لقب عاطل وتنظم للمحظوظين اللي سبقوك .
وجوايزنا حيقدمهالك قيادات الحزب الوطني في مؤتمرهم اللي جاي …الحق اتصل بينا علي (090009000900)
وسؤالنا هو مين هو مرشح الحزب في انتخابات الرئاسة اللي جاية
1 - جمال مبارك
2 - جمال مبارك
3 - جمال مبارك
يلا بسرعة مستنينك ومتفوتش الفرصة قبل ما نديلك ؟؟؟؟؟؟؟؟؟؟؟؟؟؟من غير مسابقات
السبت أبريل 26, 2014 1:22 am من طرف نبع الورود
